Реконструкция древнерусского текста Н. А. Мещерского и А. А. Бурыкина
Источник: «Слово о полку Игореве»: Сборник. Л.: Сов. писатель, 1985.
- 1. Нелепо ли ны бяшеть, братіе, начяти старыми словесы трудныхъ повестіи <песнь> о пълку Игореве, Игоря Святъславличя!
- 2. Начяти же ся тои песни по былинамъ сего времени, а не по замышленію Бояню.
- 3. Боянъ бо вещіи, аще кому хотяше песнь творити, то растекашется мыслію по древу, серымъ вълкомъ по земли, сизымъ орломъ подъ облакы.
- 4. Помняшеть бо речь пьрвыхъ временъ усобице. Тъгда пущяшеть і соколовъ на стадо лебедеи, которыи дотечяше, та преди песнь пояше старому Ярославу, храброму Мстиславу, иже зареза Редедю предъ пълкы касожьскыми, красному Романови Святъславличю.
- 5. Боянъ же, братіе, не і соколовъ на стадо лебедеи пущяше, нъ своя вещія пьрсты на живыя струны въскладаше, они же сами княземъ славу рокотаху.
- 6. Почнемъ же, братіе, повесть сію отъ стараго Владимира до нынешняго Игоря, иже истягну умъ крепостію своею и поостри <и> сьрдця своего мужьствомъ,
- 7. напълнивъся ратнаго духа, наведе своя храбрыя пълкы на землю Половецкую за землю Русьскую.
- 8. Тъгда Игорь възре на светлое сълнце и виде отъ него тьмою вся своя воя прикрыты.
- 9. И рече Игорь къ дружине своеи:
- 10. «Братіе и дружино! Луче жь бы потяту быти, неже полонену быти.
- 11. А въсядемъ, братіе, на своя бързыя комони, да позримъ синего Дону!»
- 12. Спала князю умъ похоти и жялость ему знаменіе заступи искусити Дону великаго.
- 13. «Хощю бо, – рече, – копіе приломити конець поля Половецкаго, съ вами, русичи, хощю главу свою приложити, а любо испити шеломомъ Дону!»
- 14. О Бояне, соловію стараго времени! А бы ты сія пълкы ущекоталъ, скачя, славію, по мыслену древу, летая умомъ подъ облакы, свивая славы оба полы сего времени, рыщя въ тропу Трояню чресъ поля на горы.
- 15. Пети было песнь Игореви того <Велеса> внуку:
- 16. «Не буря соколы занесе чресъ поля широкая – галици стады бежять къ Дону великому…»
- 17. Чили въспети было, вещеи Бояне, Велесовъ внуче:
- 18. «Комони ржуть за Сулою, звенить слава въ Кыеве; трубы трубять въ Новеграде, стоять стязи въ Путивле». Игорь ждеть мила брата Всеволода.
- 19. И рече ему буи туръ Всеволодъ:
- 20. «Одинъ братъ, одинъ светъ светлыи ты, Игорю, оба есве Святъславличя!
- 21. Седлаи, брате, своя бързыя комони,
- 22. а мои ти готови, оседлани у Курьска на переди.
- 23. А мои ти куряне сведоми къмети; подъ трубами повити, подъ шеломы възлелеяни, конець копія въскърмлени;
- 24. пути имъ ведоми, яругы имъ знаемы, луци у нихъ напряжени, тули отворени, сабли изъострены,
- 25. сами скачють акы серыи вълци въ поле, ищучи себе чти, а князю славы».
- 26. Тъгда въступи Игорь князь въ златъ стремень и поеха по чистому полю.
- 27. Сълнце ему тьмою путь заступаше,
- 28. нощь стонущи ему грозою птичь убуди свистъ зверинъ въста,
- 29. Дивъ кличеть вьрху древа, велить послушяти земли незнаеме, Вълзе, и Поморію, и Посулію, и Сурожю, и Корсуню, и тебе, тьмутороканьскыи бълванъ!
- 30. А половци неготовами дорогами побегошя къ Дону великому, крычять телегы полунощи, рци лебеди роспужени. Игорь къ Дону вои ведеть!
- 31. Уже бо беды его пасеть птичь по дубію. Вълци грозу въсрожать по яругамъ, орли клектомъ на кости звери зовуть, лисици брешють на чьрленыя щиты.
- 32. О Русьская земле! уже за шеломянемъ еси!
- 33. Дълго ночь мьркнеть.
- 34. Заря светъ запала, мьгла поля покрыла,
- 35. щекотъ славіи успе, говоръ галичь убудися.
- 36. Русичи великая поля чьрлеными щиты прегородишя, ищучи себе чти, а князю славы.
- 37. Съ заратя въ пятъкъ потъпташя поганыя пълкы половецкыя, и россушяся стрелами по полю, помчяшя красныя девкы половецкыя, а съ ними злато, и паволокы, и драгыя оксамиты;
- 38. орьтъмами и япончицями и кожюхы начяшя мосты мостити по болотомъ и грязивымъ местомъ, и всякыми узорочьи половецкыми.
- 39. Чьрленъ стягь, бела хорюговь, чьрлена чолка, сребрено стружіе – храброму Святъславличю!
- 40. Дремлеть въ поле Ольгово хороброе гнездо. Далече залетело!
- 41. Не было оно обиде порождено ни соколу, ни кречету, ни тебе, чьрныи воронъ, поганыи половчине!
- 42. Гза бежить серымъ вълкомъ, Кончякъ ему следъ править къ Дону великому.
- 43. Другаго дни вельми рано кръвавыя зори светъ поведають,
- 44. чьрныя тучя съ моря идуть, хотять прикрыта д сълнця, а въ нихъ трепещуть синія мълніи.
- 45. Быти грому великому! Итти дождю стрелами съ Дону великаго!
- 46. Ту ся копіемъ приламати, ту ся саблямъ потручяти о шеломы половецкыя – на реце на Каяле у Дону великаго.
- 47. О Русьская земле! Уже за шеломянемъ еси!
- 48. Се ветри, Стрибожи внуци, веють съ моря стрелами на храбрыя пълкы Игоревы.
- 49. Земля тутнеть, рекы мутно текуть, пороси поля прикрывають,
- 50. стязи глаголють. Половци идуть отъ Дона и отъ моря,
- 51. и отъ всехъ странъ русьскыя пълкы оступишя.
- 52. Дети бесови кликомъ поля прегородишя, а храбріи русичи преградишя чьрлеными щиты.
- 53. Яръ туре Всеволоде! Стоиши на борони, прыщеши на вои стрелами, гремлеши о шеломы мечи харалужными.
- 54. Камо туръ поскочяше, своимъ златымъ шеломомъ посвечивая, тамо лежять поганыя головы половецкыя.
- 55. Поскепаны саблями калеными шеломи оварьскыи отъ тебе, яръ туре Всеволоде!
- 56. Кая раны, дорога братю, забывъ чти и живота, и града Чьрнигова, отня злата стола и своя милыя хоти красныя Глебовны свычяя и обычяя!
- 57. Были веци Трояни, минула лета Ярославля, были пълци Ольговы, Ольга Святъславличя.
- 58. Тъи бо Олегъ мечемъ крамолу коваше и стрелы по земли сеяше.
- 59. Ступаеть въ златъ стремень въ граде Тьмуторокане,
- 60. тоже звонъ слышя давныи великыи Ярославль
- 61. сынъ Всеволодъ, а Владимиръ по вся утра уши закладаше въ Чьрнигове.
- 62. Бориса же Вячеславличя слава на судъ приведе и на Канину зелену паполому <ему> постла за обиду Ольгову, храбра и млада князя.
- 63. Съ тоя же Каялы Святопълкъ полелея отца своего междю угорьскыми иноходьцы къ Святеи Софіи къ Кыеву.
- 64. Тъгда при Олзе Гориславличи сеяшется и растяшеть усобицами, погыбашеть жизнь Даждьбожя внука, въ княжихъ крамолахъ веци человекомъ скратишяся.
- 65. Тъгда по Русьскои земли редко ратаеве кыкахуть, нъ чяста врани граяхуть, трупія себе деляче, а галици свою речь говоряхуть, хотять полетети на уедіе.
- 66. То было въ ты рати и въ ты пълкы, а сицеи рати не слышяно! Съ заранія до вечера, съ вечера до света летять стрелы каленыя, гримлють сабли о шеломы, трещять копія харалужная
- 67. въ поле незнаеме среди земли Половецкыя. Чьрна земля подъ копыты костьми была посеяна, а кръвію польяна, тугою възыдошя по Русьскои земли.
- 68. Что ми шюмить, что ми звенить
- 69. давечя рано предъ зорями? Игорь пълкы заворочяеть, жяль бо ему мила брата Всеволода.
- 70. Бишяся день, бишяся другыи, третья дни къ полуднію падошя стязи Игореви.
- 71. Ту ся брата разлучиста на брезе быстрои Каялы.
- 72. Ту кръваваго вина не доста;
- 73. ту пиръ докончяшя храбріи русичи, сваты попоишя, а сами полегошя за землю Русьскую.
- 74. Ничить трава жялощями, а древо ся тугою къ земли приклонило.
- 75. Уже бо, братіе, не веселая година въстала, уже пустыни силу прикрыла.
- 76. Въстала Обида въ силахъ Даждьбожя внука, въступила девою на землю Трояню, въсплескала лебедиными крылы на синемъ море у Дону, плещучи, упуди жирня времена. Усобиця
- 77. княземъ на поганыя погыбе, рекоста бо братъ брату: «Се мое, а то мое же», и начяшя князи про малое «Се великое» мълвити, а сами на себе крамолу ковати,
- 78. а поганіи съ всехъ странъ прихождаху съ победами на землю Русьскую.
- 79. О, далече заиде соколъ, птиць бья – къ морю!
- 80. А Игорева храбраго пълку не кресити.
- 81. За нимъ кликну Карна, и Жьля поскочи по Русьскои земли,
- 82. смагу людемъ мычючи въ пламяне розе. Жены русьскыя въсплакашяся, а ркучи:
- 83. «Уже намъ своихъ милыхъ ладъ ни мыслію съмыслити, ни думою съдумати, ни очима съглядати, а злата и сребра ни мало того потрепати!»
- 84. А въстона бо, братіе, Кыевъ тугою, а Чьрниговъ напастьми.
- 85. Тоска разліяся по Русьскои земли, печяль жирна тече среди земли Русьскыи.
- 86. А князи сами на себе крамолу коваху,
- 87. а поганіи сами, победами нарыщюще на Русьскую землю, емляху дань по беле отъ двора.
- 88. Тая бо два храбрая Святъславличя, Игорь и Всеволодъ, уже лжу убудиста которою. Ту бяше успилъ отець ихъ Святъславъ грозныи великыи Кыевьскыи.
- 89. Грозою бяшеть притрепеталъ, своими сильными пълкы и харалужными мечи наступи на землю Половецкую, притъпта хълмы и яругы, възмути рекы и озера, иссуши потокы и болота, а поганаго Кобяка изъ луку моря отъ железныхъ великыхъ пълковъ половецкыхъ яко вихръ вытърже, и паде ся Кобякъ въ граде Кыеве, въ гриднице Святъславли.
- 90. Ту немци и венедици, ту грьци и морава поють славу Святъславлю, кають князя Игоря, иже погрузи жиръ во дне Каялы, рекы половецкыя. Русьскаго злата насыпашя
- 91. ту, Игорь князь выседе изъ седла злата а въ седло кощіево
- 92. Унышя бо градомъ забрала, а веселіе пониче.
- 93. А Святъславъ мутенъ сонъ виде.
- 94. «Въ Кыеве на горахъ си ночь съ вечера одевахуть мя, – рече, – чьрною паполомою на кровати тисове,
- 95. чьрпахуть ми синее вино съ трудомъ смешено.
- 96. сыпахуть ми тъщими тулы поганыхъ тълковинъ великыи женчюгъ на лоно
- 97. и негують мя. Уже дъскы безъ кнеса въ моемъ тереме златовьрсемъ.
- 98. Всю нощь съ вечера Бусови врани възграяху,
- 99. у Плесньска на болони бешя дебри Кыяне и несошяся къ синему морю».
- 100. И рькошя бояре князю:
- 101. «Уже, княже, туга умъ полонила.
- 102. Се бо два сокола слетеста съ отня стола злата поискати града Тьмутороканя, а любо испити шеломомъ Дону. Уже соколома крыльця припешали поганыхъ саблями, а самою опуташя въ путины железны.
- 103. Тьмно бо бе въ г день, два сълнця помьркоста, оба багряная стълпа погасоста и въ море погрузиста, и великое буиство подаста хынови, и съ нима молодая месяця, Олегъ и Святъславъ, тьмою ся поволокоста.
- 104. На реце на Каяле тьма светъ покрыла,
- 105. по Русьскои земли прострошяся половци акы пардуже гнездо.
- 106. Уже снесеся хула на хвалу,
- 107. уже тресну нужда на волю,
- 108. уже вьржеся Дивъ на землю.
- 109. Се бо готьскыя красныя девы въспешя на брезе синему морю: звоня Русьскымъ златомъ, поють время Бусово, лелеють месть Шароканю.
- 110. А мы уже дружина жядни веселія!»
- 111. Тъгда великыи Святъславъ изрони злато слово сльзами смешено и рече:
- 112. «О моя сыновьця, Игорю и Всеволоде! Рано еста начала Половецкую землю мечи цвелити, а себе славы искати. Нъ не честно одолесте, не честно бо кровь поганую проліясте.
- 113. Ваю храбрая сьрдця въ жестоцемъ харалузе скована, а въ буести закалена.
- 114. Се ли створисте моеи сребренеи седине?
- 115. А уже не вижду власти сильнаго и богатаго и многовои брата моего Ярослава съ Чьрниговьскыми былями, съ могуты и съ татраны, и съ шельбиры, и съ топчакы, и съ ревугы, и съ ольберы. Тіи бо бесъ щитовъ съ засапожникы кликомъ пълкы побеждають, звонячи въ прадеднюю славу.
- 116. Нъ рекосте: «Мужаимеся сами, преднюю славу сами похытимъ, а заднею ся сами поделимъ!»
- 117. А чи диво ся, братце, стару помолодити?
- 118. Коли соколъ въ мытехъ бываеть, высоко птиць възбиваеть, не дасть гнезда своего въ обиду.
- 119. Нъ се зло, княже ми непособіе.
- 120. Наниче ся годины обратишя.
- 121. Се у Римъ крычять подъ саблями половецкыми, а Володимиръ подъ ранами.
- 122. Туга и тоска сыну Глебову!
- 123. Великии княже Всеволоде! Не мыслію ти прелетети издалечя отня злата стола поблюсти.
- 124. Ты бо можеши Вългу веслы раскропити, а Донъ шеломы выльяти.
- 125. Аже бы ты былъ, то была бы чяга по ногате, а кощеи по резане.
- 126. Ты бо можеши посуху живыми шереширы стреляти, удалыми сыны Глебовы.
- 127. Ты буи Рюриче и Давыде! Не ваю ли <вои> злачеными шеломы по кръви плавашя?
- 128. Не ваю ли храбрая дружина рыкають акы тури, ранени саблями калеными на поле незнаеме?
- 129. Въступита, господина, въ злата стремени за обиду сего времени, за землю Русьскую, за раны Игоревы, буего Святъславличя!
- 130. Галичьскыи Осмомысле Ярославе! Высоко седиши на своемъ златокованнемъ столе, подпьръ горы угорьскыя своими железными пълкы, заступивъ королеви путь, затворивъ Дунаю ворота, мечя бремены чрезъ облакы, суды рядя до Дуная.
- 131. Грозы твоя по землямъ текуть, отворяеши Кыеву врата, стреляеши съ отня злата стола салътаны за землями.
- 132. Стреляи, господине, Кончяка, поганаго кощея, за землю Русьскую, за раны Игоревы, буего Святъславличя!
- 133. А ты буи Романе и Мстиславе! Храбрая мысль носить ваю умъ на дело.
- 134. Высоко плаваеши на дело въ буести, яко соколъ на ветрехъ ширяяся, хотя птицю въ буистве одолети.
- 135. Суть бо у ваю железніи паперси подъ шеломы латиньскыми. Теми тресну земля, и многы страны – хинова, литъва, ятвязи, деремела и половци сулици своя повьргошя, а главы своя поклонишя подъ тыи мечи харалужныи.
- 136. Нъ уже, княже Игорю, утърпе сълнцю светъ, а древо не бологомъ листвіе сърони,
- 137. по Ръси и по Сули грады поделишя, а Игорева храбраго пълку не кресити.
- 138. Донъ ти, княже, кличеть и зоветь князи на победу.
- 139. Ольговичи храбріи князи доспели на брань.
- 140. Инъгварь и Всеволодъ и вси три Мстиславичи, не худа гнезда шестокрыльци! Не победными жребіи собе власти расхытисте.
- 141. Кое ваши златыи шеломи и сулици ляцькыя и щити?
- 142. Загородите полю ворота своими острыми стрелами за землю Русьскую, за раны Игоревы, буего Святъславличя!
- 143. Уже бо Сула не течеть сребреными струями къ граду Переяславлю, и Двина болотомъ течеть онымъ грознымъ полочяномъ подъ кликомъ поганыхъ.
- 144. Единъ же Изяславъ сынъ Васильковъ позвони своими острыми мечи о шеломы литовьскыя, притрепа славу деду своему Всеславу, а самъ подъ чьрлеными щиты на кръваве траве притрепанъ литовьскыми мечи. Исходи юна кровъ,
- 145. а тъи рекъ:
- 146. «Дружину твою, княже, птичь крылы приоде, а звери кровь полизашя».
- 147. Не бысть ту брата Брячислава, ни другаго – Всеволода, единъ же изрони жемчюжну душю изъ храбра тъла чресъ злато ожереліе.
- 148. Уныли голоси, пониче веселіе, трубы трубять городеньскыя.
- 149. Ярославле и вси внуци Всеславли! Уже понизите стязи свои, вонзите свои мечи вережени,
- 150. уже бо выскочисте изъ деднеи славы.
- 151. Вы бо своими крамолами начясте наводити поганыя на землю Русьскую, на жизнь Всеславлю,
- 152. которою бо беше насиліе отъ земли Половецкыя. На седьмомъ веце Трояни
- 153. вьрже Всеславъ жребии о девицю себе любу.
- 154. Тъи клюками подъпьръ ся окони, и скочи къ граду Кыеву, и дотчеся стружіемъ злата стола Кыевьскаго.
- 155. Скочи отъ нихъ лютымъ зверемъ въ пълночи изъ Белаграда, обесися сине мьгле,
- 156. утърже вазни съ три кусы, отвори врата Новуграду, разъшибе славу Ярославу,
- 157. скочи вълкомъ до Немигы – съду токъ. На Немизе снопы стелють головами, молотять цепы харалужными, на тоце животь кладуть, веють душю отъ тела.
- 158. Немизе кръвави брезе не бологомъ бяхуть посеяни, посеяни костьми русьскыхъ сыновъ.
- 159. Всеславъ князь людемъ судяше, княземъ грады рядяше, а самъ въ ночь вълкомъ рыскаше, изъ Кыева дорыскаше до куръ Тьмутороканя, великому Хърсови вълкомъ путь прерыскаше.
- 160. Тому въ Полотьске позвонишя заутренюю рано у Святыя Софеи въ колоколы, а онъ въ Кыеве звонъ слышя.
- 161. Аще и вещя душя въ друзе теле, нъ чясто беды страдаше.
- 162. Тому вещеи Боянъ и пьрвое припевку, смысленыи, рече:
- 163. «Ни хытру, ни горазду, ни пытьцю горазду суда Божія не минути!»
- 164. О, стонати Русьскои земли, помянувъше пьрвую годину и пьрвыхъ князеи!
- 165. Того стараго Владимира не льзе бе пригвоздити къ горамъ Кыевьскымъ,
- 166. сего бо ныне сташя стязи Рюрикови, а друзіи Давидови, нъ розьно ся имъ хоботы пашють,
- 167. копія поють!
- 168. На Дунаи Ярославнынъ гласъ слышить, зегзицею незнаемъ рано кычеть:
- 169. «Полечю, – рече, – зегзицею по Дунаеви,
- 170. омочю бебрянъ рукавъ въ Каяле реце,
- 171. утру князю кръвавыя его раны на жестоцемъ его теле».
- 172. Ярославна рано плачеть въ Путивле на забрале, а ркучи:
- 173. «О ветре ветрило! Чему, господине, насильно вееши?
- 174. Чему мычеши хыновьскыя стрелкы на своею нетрудную крыльцю на моея лады вои?
- 175. Мало ли ти бяшеть горъ подъ облакы веяти, лелеючи корабли на сине море?
- 176. Чему, господине, мое веселіе по ковылію разъвея?»
- 177. Ярославна рано плачеть Путивлю городу на забороле, а ркучи:
- 178. «О Днепре Словутичю! Ты пробилъ еси каменныя горы сквозь землю Половецкую.
- 179. Ты лелеялъ еси на себе Святъславли носады до пълку Кобякова.
- 180. Възлелеи, господине, мою ладу къ мне, а быхъ не слала къ нему слезъ на море рано!»
- 181. Ярославна рано плачеть въ Путивле на забрале, а ркучи:
- 182. «Светлое и тресветлое сълнце! Всемъ тепло и красно еси.
- 183. Чему, господине, простре горячюю свою лучю на лады вои, въ поле безводне жяждею имъ луци съпряже, тугою имъ тулы затъче?»
- 184. Прысну море полунощи, идуть смьрчи мьглами, Игореви князю Богъ путь кажеть изъ земли Половецкыя на землю Русьскую, къ отню злату столу.
- 185. Погасошя вечеру зори. Игорь спить, Игорь бдить, Игорь мыслію поля мерить отъ великаго Дону до малаго Донця.
- 186. Комоньнъ въ полуночи Овлуръ свисну за рекою, велить князю разумети. Князю Игорю не быть!
- 187. Кликну, стукну земля, въшюме трава, вежи ся половецкыя подвизашя.
- 188. А Игорь князь поскочи гърностаемъ къ тростію и белымъ гоголемъ на воду,
- 189. въвьржеся на бързъ комонь, и скочи съ него босымъ вълкомъ,
- 190. и потече къ лугу Донця, и полете соколомъ подъ мьглами, избивая гуси и лебеди завтроку, и обеду, и ужине.
- 191. Коли Игорь соколомъ полете, тъгда Влуръ вълкомъ потече, труся собою студеную росу, претъргоста бо своя бързая комоня.
- 192. Донець рече:
- 193. «Княже Игорю! Не мало ти величія, а Кончаку нелюбія, а Русьскои земли веселія!»
- 194. Игорь рече:
- 195. «О Донче! Не мало ти величія, лелеявъшю князя на вълнахъ, стлавъшю ему зелену траву на своихъ сребреныхъ брезехъ, одевавъшю его теплыми мьглами подъ сенію зелену древу,
- 196. стрежаше его гоголемъ на воде, чаицями на струяхъ, чьрнядьми на ветрехъ.
- 197. Не тако ли, рече, река Стугна, худу струю имея, пожьръши чюжи ручьи и стругы, рострена къ усту, уношю князя Ростислава затвори дне при темне березе.
- 198. Плачеться мати Ростиславля по уноши князи Ростиславе.
- 199. Унышя цветы жялобою, и древо ся тугою къ земли приклонило.
- 200. А не сорокы въстроскоташя, на следу Игореве ездить Гза съ Кончякомъ.
- 201. Тъгда врани не граяхуть, галици помълкошя, сорокы не троскоташя,
- 202. полозіе ползошя только. Дятлове текътомъ путь къ реце кажуть, соловіи веселыми песньми светъ поведають.
- 203. Мълвить Гза къ Кончякови:
- 204. «Аже соколъ къ гнезду летить, соколичя ростреляеве своими злачеными стрелами».
- 205. Рече Кончякъ ко Гзе:
- 206. «Аже соколъ къ гнезду летить, а ве сокольця опутаеве красною девицею».
- 207. И рече Гза къ Кончакови:
- 208. «Аще его опутаеве красною девицею, ни нама будеть сокольця, ни нама красны девице, то почнуть наю птици бити въ поле Половецкомъ».
- 209. Рекъ Боянъ и Ходына, Святъславля песнотворця стараго времени Ярославля, Ольгова коганя хоти:
- 210. «Тяжько ти голове кроме плечю, зло ти телу кроме головы» – Русьскои земли безъ Игоря.
- 211. Солнце светиться на небесе – Игорь князь въ Русьскои земли.
- 212. Девици поють на Дунаи, вьються голоси чрезъ море до Кыева.
- 213. Игорь едеть по Боричеву къ Святеи Богородици Пирогощеи.
- 214. Страны рады, гради весели.
- 215. Певъше песнь старымъ княземъ, а потомъ молодымъ пети.
- 216. Слава Игорю Святъславличю, буи туру Всеволоду, Владимиру Игоревичи.
- 217. Здрави князи и дружина, побарая за христьяны на поганыя пълкы.
- 218. Княземъ слава а дружине. Аминь.
Ссылка
Если вы используете корпус в научной работе, пожалуйста, сошлитесь на эту публикацию:
Орехов Б. В. Параллельный корпус переводов «Слова о полку Игореве»: итоги и перспективы // Национальный корпус русского языка: 2006—2008. Новые результаты и перспективы. — СПб.: Нестор-История, 2009. — С. 462—473.