Реконструкция А. В. Дыбо
Источник:
«Слово о полку Игореве»: текст и его окрестности. СПб: Вита Нова, 2006. С. 390409.
http://chernov-trezin.narod.ru/TitulSlova.htm
- 1. Не лѣпо ли ны
бѧшеть братие
начати старыми словесы
троудьныхъ повѣстии
о пълкоу игоревѣ
игорѧ свѧтъславлича - 2. начати же сѧ тъи пѣсни
по былинамъ сего времени
а не по замышлению боꙗню - 3. боꙗнъ бо вѣщии
аще комоу хотѧше
пѣснѣ творити
то растѣкашетьсѧ мыслию по древоу
сѣрымь вълкомь по земли
шизымь орьломь подъ облакы - 4. помьнѧшеть бо речь
пьрвыхъ временъ оусобицѣ
тогда поущашеть
десѧть соколовъ
на стадо лебедѣи
которыѣ дотечаше
та преди пѣснь поꙗше
старомоу ꙗрославоу
храбромоу мьстиславоу
иже зарѣза редедю
предъ пълкы касожьскыми
красьномоу романови свѧтъславличю - 5. боꙗнъ же братие не десѧть соколовъ
на стадо лебедѣи поущаше
нъ своѣ вѣщиѣ пьрсты
на живыѣ строуны въскладаше
они же сами кънѧземъ
славоу рокотахоу - 6. Почьнемъ же братие повѣсть сию
отъ стараго владимера
до нынѣшьнѧго игорѧ
иже истѧгноу оумъ крѣпостию своею
и поостри сьрдьца своего моужествомь - 7. напълнивъсѧ ратьнаго доуха
наведе своѣ храбрыѣ пълкы
на землю половѣцькоую
за землю роуськоую - 8. тогда игорь възьрѣ
на свѣтьлое сълньце
и видѣ отъ него тьмою
вьсѣ своѣ воѣ прикрыты - 9. и рече игорь къ дроужинѣ своеи
- 10. братие и дроужино
лоуце жъ бы потѧтоу быти
неже полоненоу быти - 11. а въсѧдемъ братие
на свои бързыѣ комони
да позьримъ синего доноу - 12. съпала кънѧзю оумъ похоть
и жалость емоу знамение застоупи
искоусити доноу великаго - 13. хощю бо рече копие приломити
конець полѧ половецькаго
съ вами роусици
хощю главоу свою приложити
а любо испити шеломомь доноу - 14. О боꙗне соловию стараго времени
абы ты сиѣ пълкы оущекоталъ
скача славию по мысленоу древоу
летаꙗ оумомь подъ облакы
свиваꙗ славы оба полы сего времени
рища въ тропоу троꙗню
чрес полѧ на горы - 15. пѣти было пѣснь игореви
того въноукоу - 16. не боурѧ соколы занесе
чрес полѧ широкаꙗ
галици стады бѣжать
къ доноу великомоу - 17. чи ли въспѣти было
вѣщеи боꙗне велесовъ въноуче - 18. комони ржють за соулою
звенить слава въ кыевѣ
троубы троубѧть въ новѣградѣ
стоꙗть стѧзи въ поутивли
Игорь жьдеть мила брата вьсеволода - 19. и рече емоу боуи тоуръ вьсеволодъ
- 20. одинъ братъ одинъ свѣтъ
свѣтьлыи ты игорю
оба есвѣ свѧтъславлича - 21. сѣдьлаи брате свои
бързыѣ комони - 22. а мои ти готови осѣдьлани
оу коурьска на переди - 23. а мои ти коурѧни
съвѣдоми къмети
подъ троубами повити
подъ шеломы възлелѣꙗни
конець копиꙗ въскърмлени - 24. поути имъ вѣдоми
ꙗроугы имъ знаеми
лоуци оу нихъ напрѧжени
тоули отъворени
сабли изострени - 25. сами скачють
акы сѣрыи вълци
въ полѣ ищючи
собе чьсти
а кънѧзю славы - 26. Тогда въстоупи игорь кънѧзь
въ златъ стремень и поѣха
по чистомоу полю - 27. сълньце емоу тъмою поуть застоупаше
- 28. нощь стоноущи емоу грозою
пътичь оубоуди свистъмь звѣри
нъ възбисѧ - 29. дивъ
кличеть вьрхоу древа
велить послоушати земли незнаемѣ
вълзѣ и поморию и посоулию
и соурожю и корсоуню
и тобѣ тьмоутороканьскыи бълване - 30. а половьци неготовами дорогами
побѣгоша къ доноу великомоу
кричать тѣлѣгы полоунощи
рьци лебеди роспоущени
игорь къ доноу вои ведеть - 31. оуже бо бѣды его пасеть
пътиць по дѹбию
вълци грозоу въсърошать по ꙗроугамъ
орьли клекътомь на кости звѣри зовоуть
лисици брешють на чьрленыѣ щиты - 32. о роуськаꙗ земле
оуже за шеломенемь еси - 33. дълго ночь мьркнеть
- 34. зарѧ свѣтъ запала
мъгла полѧ покрыла - 35. щекотъ славии оусъпе
говоръ галичь оубоудисѧ - 36. роусичи великаꙗ полѧ
чьрлеными щиты перегородиша
ищючи собѣ чьсти а кънѧзю славы - 37. Съ зараниꙗ въ пѧтъкъ потопъташа
поганыѣ пълкы половецькыѣ
и расоушасѧ стрѣлами по полю помьчаша
красьныѣ дѣвъкы половецькыѣ
а съ ними злато и паволокы
и драгыѣ оксамиты - 38. орьтъмами и ꙗпоньчицами и кожюхы
начаша мосты мостити
по болотомъ и грѧзивымъ мѣстомъ
и вьсѧкыми оузорочьи половѣцькыми - 39. чьрленъ стѧгъ
бѣла хороуговь
чьрлена челъка
сьребрено строужие
храбромоу свѧтъславличю - 40. дремлеть въ полѣ ольгово
хороброе гнѣздо
далече залетѣло - 41. не было нъ
обидѣ порождено
ни соколоу ни кречетоу
ни тобѣ чьрныи воронъ
поганыи половьчине - 42. гъзакъ бѣжить сѣрымь вълкомь
коньчакъ емоу слѣдъ править
къ доноу великомоу - 43. Дроугаго дьни вельми рано
кровавыѣ зори свѣтъ повѣдають - 44. чьрныѣ тоучѣ съ морѧ идоуть
хотѧть прикрыти четыре сълньца
а въ нихъ трепещють синѣѣ мълнии - 45. быти громоу великомоу
ити дождю стрѣлами
съ доноу великаго - 46. тоу сѧ копиемъ приламати
тоу сѧ саблѧмъ потроучати
о шеломы половецькыѣ
на рѣцѣ на каꙗлѣ
оу доноу великаго - 47. о роуськаꙗ землѣ
оуже за шеломенемь еси - 48. се вѣтри стрибожи въноуци
вѣють съ морѧ стрѣлами
на храбрыѣ пълкы игоревы - 49. землѧ тоутнеть
рѣкы моутьно текоуть
пороси полѧ прикрывають - 50. стѧзи глаголють
половьци идоуть отъ дона
и отъ морѧ - 51. и отъ вьсѣхъ странъ
роуськыѣ пълкы остоупиша - 52. дѣти бѣсови кликомь
полѧ перегородиша
а храбрии роусици преградиша
чьрлеными щиты - 53. ꙗръ тоуре вьсеволодѣ
стоиши на борони
прыщеши на вои стрѣлами
гремлеши о шеломы
мечи харалоужьными - 54. камо тоуръ поскочаше
своимь златымь шеломомь посвѣчиваꙗ
тамо лежать поганыѣ
головы половецькыѣ - 55. поскепаны саблѧми калеными
шеломы оварьскыѣ
отъ тебе ꙗръ тоуре вьсеволоде - 56. каꙗ раны дорога братие
забывъ чьсти и живота
и града чьрнигова
отьнѧ злата стола
и своѣ милыѣ хоти
красьныѣ глѣбовьны
съвычаꙗ и обычаꙗ - 57. Были вѣчи троꙗни
миноула лѣта ꙗрославлѧ
были пълци ольговы
ольга свѧтъславлича - 58. тъи бо олегъ
мечемь крамолоу коваше
и стрѣлы по земли сѣꙗше - 59. стоупаеть въ златъ стремень
въ градѣ тьмоуторокани - 60. то же звонъ слыша
давьныи великыи ꙗрославъ - 61. а сынъ вьсеволожь
владимѣръ по вьсѧ оутра
оуши закладаше въ чьрниговѣ - 62. бориса же вѧчеславлича
слава на соудъ приведе
и на каниноу зеленоу
паполомоу постьла
за обидоу ольговоу
храбра и млада кънѧзѧ - 63. съ тоѣ же каꙗлы свѧтопълкъ
полелѣꙗ отьца своего
межю оугорьскыми иноходьци
ко свѧтѣи софии къ кыевоу - 64. тогда при ользѣ гориславличи
сѣꙗшетьсѧ и растѧшеть оусобицами
погыбашеть жизнь дажьбожа въноука
въ кънѧжахъ крамолахъ
вѣци человѣкомъ съкратишасѧ - 65. тогда по роуськои земли
рѣтко ратаевѣ кыкахоуть
нъ часто врани граꙗхоуть
троупиꙗ собѣ дѣлѧче
а галици свою рѣчь говорѧхоуть
хотѧть полетѣти на оуедие - 66. то было въ ты рати и въ ты пълкы
а сицеѣ рати не слышано
Съ зараниꙗ до вечера
съ вечера до свѣта
летѧть стрѣлы каленыѣ
гримлють сабли о шеломы
трещать копиꙗ харалоужьнаꙗ - 67. въ полѣ незнаемѣ
середи земли половецькыѣ
чьрна землѧ подъ копыты
костьми была посѣꙗна
а кровию польꙗꙗна
тоугою възидоша
по роуськои земли - 68. чьто ми шюмить
чьто ми звенить - 69. давеча рано предъ зорѧми
игорь пълкы заворочаеть
жаль бо емоу
мила брата
вьсеволода - 70. бишасѧ день
бишасѧ дроугыи
третьꙗго дьни къ полоудьнию
падоша стѧзи игоревы - 71. тоу сѧ брата разлоучиста
на березѣ быстрыѣ каꙗлы - 72. тоу кроваваго вина не доста
- 73. тоу пиръ доконьчаша
храбрии роусичи
сваты попоиша
а сами полегоша
за землю роуськоую - 74. ничить трава жалощами
а древо сѧ тоугою
къ земли преклонило - 75. оуже бо братие
не веселаꙗ година въстала
оуже поустыни силоу прикрыла - 76. въстала обида
въ силахъ дажьбожа въноука
въстоупила дѣвою
на землю троꙗню
въсплескала лебединыма крылома
на синѣмь море оу доноу
плещючи оубоуди жирьнѧ веремена
оусобица - 77. кънѧземъ на поганыѣ погыбе
рекоста бо братъ братоу
се мое а то мое же
и начаша кънѧзи про малое
се великое мълвити
а сами на собѣ крамолоу ковати - 78. а погании съ вьсѣхъ странъ
прихождахоу съ побѣдами
на землю роуськоую - 79. О далече заиде соколъ
пътиць бьꙗ къ морю - 80. а игорева храбраго
пълкоу не крѣсити - 81. за нимь кликноу карьна
и жьлѧ поскочи
по роуськои земли - 82. смагоу людемъ мычючи
въ пламѧнѣ розѣ
жены роуськыѣ въсплакашасѧ а рькоучи - 83. оуже намъ своихъ милыхъ ладъ
ни мыслию съмыслити
ни доумою съдоумати
ни очима съглѧдати
а злата и сьребра
ни мало того потрепати - 84. а въстона бо братие
кыевъ тоугою
а чьрниговъ напастьми - 85. тоска разлиꙗсѧ по роуськои земли
печаль жирьна тече
середь земли роуськыѣ - 86. а кънѧзи сами на собе
крамолоу ковахоу - 87. а погании сами
побѣдами нарищюще
на роуськоую землю
емлѧхоу дань по бѣлѣ отъ двора - 88. Та бо дъва храбраꙗ свѧтъславлича
игорь и вьсеволодъ
оуже лъжю оубоудиста
котороую то бѧше оусъпилъ
отець ею свѧтъславъ
грозьныи великыи кыевьскыи - 89. грозою бѧшеть притрепеталъ
своими сильными пълкы
и харалоужьными мечи
настоупи на землю половецькоую
притопъта хълми и ꙗроугы
възмоути рѣкы и озера
исоуши потокы и болота
а поганаго кобѧка из лоукоу морѧ
отъ желѣзьныхъ великыхъ
пълковъ половецькыхъ
ꙗко вихърь вытърже
и падесѧ кобѧкъ въ градѣ кыевѣ
въ гридьницѣ свѧтъславли - 90. тоу нѣмьци и венедици
тоу греци и морава
поють славоу свѧтъславлю
кають кънѧзѧ игорѧ
иже погроузи жиръ
во дънѣ каꙗлы
рѣкы половецькыѣ
роуськаго злата насыпаше - 91. тоу игорь кънѧзь высѣдѣ
из сѣдьла злата
а въ сѣдьло кощиево - 92. оуныша бо градомъ забралы
а веселие пониче - 93. А свѧтъславъ моутенъ сонъ видѣ
- 94. въ кыевѣ на горахъ
си ночь съ вечера
одѣвахоуте мѧ рече
чьрною паполомою
на кровати тисовѣ - 95. чьрпахоуть ми синее вино
съ троудомь съмѣшено - 96. сыпахоуть ми тъщими тоулы
поганыхъ тълковинъ
великыи женьчюгь на лоно - 97. и нѣгоують мѧ
оуже дьскы бес кънѣса въ моемь
теремѣ златовьрсѣмь - 98. вьсю нощь съ вечера
боусови врани възграꙗхоу - 99. оу плѣсьньска на болони
бѣша дебрьскы сани
и несошасѧ къ синемоу морю - 100. И рькоша боꙗре кънѧзю
- 101. оуже кънѧже тоуга оумъ полонила
- 102. се бо дъва сокола сълѣтѣста
съ отьнѧ стола злата
поискати града тьмоутороканѧ
а любо испити шеломомь доноу
оуже соколома крильца припѣшали
поганыхъ саблѧми
а самою опоуташа
въ поутины желѣзьны - 103. темьно бо бѣ въ третѣи день
дъва сълньца помѣркоста
оба багрѧнаꙗ стълпа погасоста
и съ нима молодаꙗ мѣсѧца
олегъ и свѧтъславъ
тъмою сѧ поволокоста - 104. на рѣцѣ на каꙗлѣ
тьма свѣтъ покрыла - 105. по роуськои земли
простьрошасѧ половьци
акы пардоуше гнѣздо
и въ морѣ сѧ погроузиста
и великое боуиство
подаста хынови - 106. оуже сънесесѧ хоула на хвалоу
- 107. оуже тресноу ноужа на волю
- 108. оуже вьржесѧ дивъ на землю
- 109. се бо готьскыѣ красьныѣ дѣвы
въспѣша на березѣ синемоу морю
звонѧ роуськымь златомь
поють веремѧ боусово
лелѣють месть шароканю - 110. а мы оуже дроужина жадьни веселиꙗ
- 111. Тогда великыи свѧтъславъ
изрони злато слово
съ слезами съмѣшено и рече - 112. о моꙗ сыновьча
игорю и вьсеволоде
рано еста начала
половецькоую землю
мечи цвѣлити
а собѣ славы искати
нъ нечестьно одолѣсте
нечестьно бо кровь
поганоую пролиꙗсте - 113. ваю храбраꙗ сьрдьца
въ жестоцемь харалоузѣ съкованѣ
а въ боуести закаленѣ - 114. се ли сътвористе
моеи сьребренеи сѣдинѣ - 115. а оуже не вижю власти
сильнаго и богатаго и мъноговои
брата моего ꙗрослава
съ чьрниговьскыми былѧми
съ могоуты и съ татраны
и съ шельбиры и съ топчакы
и съ ревоугы и съ ольберы
тии бо бес щитовъ
съ засапожьникы
кликомь пълкы побѣждають
звонѧчи въ прадѣдьнюю славоу - 116. нъ рекосте
моужаимѣ сѧ сами
передьнюю славоу сами похытимъ
а задьнею сѧ сами подѣлимъ - 117. а чи диво сѧ братие
староу помолодити - 118. коли соколъ въ мытѣхъ бываеть
высоко пътиць възбиваеть
не дасть гнѣзда своего въ обидоу - 119. нъ се зъло кънѧжье ми непособие
- 120. на ниче сѧ годины обратиша
- 121. се оу римъва кричать
подъ саблѧми половецькыми
а володимѣръ подъ ранами - 122. тоуга и тоска сыноу глѣбовоу
- 123. великыи кънѧже вьсеволоде
не мыслию ти прелетѣти издалеча
отьнѧ злата стола поблюсти - 124. ты бо можеши вългоу веслы раскропити
а донъ шеломы выльꙗти - 125. аже бы ты былъ то была бы
чага по ногатѣ
а кощеи по резанѣ - 126. ты бо можеши посоухоу
живыми шереширы стрѣлѧти
оудалыми сыны глѣбовы - 127. Ты боуи рюриче и давыде
не ваю ли боꙗре
злачеными шеломы
по крови плаваша - 128. не ваю ли храбраꙗ дроужина
рыкають акы тоури
ранены саблѧми калеными
на полѣ незнаемѣ - 129. въстоупита господина
въ злата стремени
за обидоу сего времени
за землю роуськоую
за раны игоревы
боуего свѧтъславлича - 130. галичькъи осмомыслѣ ꙗрославе
высоко сѣдиши на своемь
златокованѣмь столѣ
подъперъ горы оугорьскыѣ
своими желѣзьными пълкы
застоупивъ королеви поуть
затворивъ доунаю ворота
меча беремены через облакы
соуды рѧдѧ до доунаꙗ - 131. грозы твоѣ по землѧмъ текоуть
отъворѧеши кыевоу врата
стрѣлѧеши съ отьнѧ злата стола
салътани за землѧми - 132. стрѣлѧи господине коньчака
поганаго кощеꙗ
за землю роуськоую
за раны игоревы
боуего свѧтъславлича - 133. А ты боуи романе и мьстиславе
храбраꙗ мысль носить
ваю оумъ на дѣло - 134. высоко плаваеши
на дѣло въ боуести
ꙗко соколъ на вѣтрехъ ширѧꙗсѧ
хотѧ пътицю въ боуиствѣ одолѣти - 135. соуть бо оу ваю желѣзьныи папорзи
подъ шеломы латиньскыми
тѣми тресноу землѧ и мъногы страны
хынова литъва ꙗтвѧзи деремела
и половьци соулици своѣ повьргоша
а главы своѣ поклониша
подъ тыѣ мечи харалоужьныѣ - 136. нъ оуже кънѧже
игорю оутьрпѣ сълньцю свѣтъ
а дерево не бологомь листъвие сърони - 137. по ръси и по соулѣ гради подѣлиша
а игорева храбраго пълкоу не крѣсити - 138. донъ ти кънѧже кличеть
и зоветь кънѧзи на побѣдоу - 139. ольговичи храбрыи кънѧзи
доспѣли на брань - 140. инъгварь и вьсеволодъ
и вьси трие мьстиславличи
не хоуда гнѣзда шестокрильци
непобѣдьными жеребии
собѣ власти расхытисте - 141. кое ваши златыи шеломы
и соулици лѧцькыѣ и щиты - 142. загородите полю ворота
своими острыми стрѣлами
за землю роуськоую
за раны игоревы
боуего свѧтъславлича - 143. Оуже бо соула не течеть
сьребреными строуꙗми
къ градомъ переꙗславлѧ
и двина болотомь течеть
онымъ грозьнымъ полочаномъ
подъ кликомь поганыхъ - 144. единъ же изѧславъ
сынъ васильковъ
позвони своими острыми мечи
о шеломы о литовьскыѣ
притрепа славоу
дѣдоу своемоу вьсеславоу
а самъ подъ чьрлеными щиты
на кровавѣ травѣ
притрепанъ литовьскыми мечи
и съхоти ю на кровъ - 145. ать и рекъмо
- 146. дроужиноу твою кънѧже
пътицѣ крилы приодѣша
а звѣри кровь полизаша - 147. не бысть тоу брата брѧчислава
ни дроугаго вьсеволода
единъ же изрони женьчюжьноу доушю
ис храбра тѣла через злато ожерелие - 148. оунылы голоси пониче веселие
троубы троубѧть городеньскыѣ - 149. ꙗрославли и вьси въноуци вьсеславли
оуже понизить стѧзи свои
воньзить свои мечи вережени - 150. оуже бо выскочисте из дѣдьнеѣ славы
- 151. вы бо своими крамолами
начасте наводити поганыѣ
на землю роуськоую
на жизнь вьсеславлю - 152. которою бо бѣше насилие
отъ земли половецькыѣ
На седьмомь вѣцѣ троꙗни - 153. вьрже вьсеславъ жеребии
о дѣвицю собѣ любоу - 154. тъи клюками подъпьръсѧ окони
искочи къ градоу кыевоу
и дотъчесѧ строужиемь
злата стола кыевьскаго - 155. скочи отъ нихъ лютымь звѣремь
въ пълъночи из бѣлагорода
обѣсисѧ синѣ мьглѣ - 156. оутърже вазни съ три коусы
отъвори ворота новоугородоу
расшибе славоу ꙗрославоу - 157. скочи вълкомь до немигы съ доудоутокъ
на немизѣ снопы стелють головами
молотѧть чепы харалоужьными
на тоцѣ животъ кладоуть
вѣють доушю отъ тѣла - 158. немизѣ кровави берези
не бологомь бѧхоуть посѣꙗни
посѣꙗни костьми роуськыхъ сыновъ - 159. вьсеславъ кънѧзь людемъ соудѧше
кънѧземъ грады рѧдѧше
а самъ въ ночь вълкомь рискаше
ис кыева дорискаше
до коуръ тьмоутороканѧ
великомоу хърсови
вълкомь поуть прерискаше - 160. томоу въ полотьскѣ позвониша заоутренюю
рано оу свѧтыѣ софѣи въ колоколы
а онъ въ кыевѣ звонъ слыша - 161. аще и вѣща доуша въ дроузѣ тѣлѣ
нъ часто бѣды страдаше - 162. томоу вѣщеи боꙗнъ
и пьрвое припѣвъкоу съмысленыи рече - 163. ни хытроу, ни гораздоу
ни пътицю гораздоу
соуда божиꙗ не миноути - 164. О стонати роуськои земли
помѧноувъше пьрвоую годиноу
и пьрвыхъ кънѧзеи - 165. того стараго владимѣра
не льзѣ бѣ пригвоздити
къ горамъ кыевьскымъ - 166. сего бо нынѣ сташа
стѧзи рюрикови
а дроузии давидови
нъ розѣно сѧ имъ хоботы пашють - 167. копиꙗ поють
- 168. На доунаи ꙗрославьнинъ
гласъ сѧ слышить
зегъзицею незнаемь
рано кычеть - 169. полечю рече зегъзицею по доунаеви
- 170. омочю бебрѧнъ роукавъ въ рѣцѣ въ каꙗлѣ
- 171. оутьроу кънѧзю кровавыѣ его раны
на жестоцѣмь его тѣлѣ - 172. ꙗрославьна рано плачеть
въ поутивли на забралѣ а рькоучи - 173. о вѣтрѣ вѣтрило
чемоу господине
насильно вѣеши - 174. чемоу мычеши
хыновьскыѣ стрѣлъкы
на своею нетроудьною крильцю
на моеѣ лады вои - 175. мало ли ти бѧшеть горѣ
подъ облакы вѣꙗти
лелѣючи корабли
на синѣ морѣ - 176. чемоу господине
мое веселие
по ковылию развѣꙗ - 177. ꙗрославьна рано плачеть
поутивлю городоу
на заборолѣ а рькоучи - 178. о дънепре словоутицю
ты пробилъ еси каменьныѣ горы
сквозѣ землю половецькоую - 179. ты лелѣꙗлъ еси на собѣ
свѧтославли носады
до пълкоу кобѧкова - 180. възлелѣи господине
мою ладоу къ мьнѣ
а быхъ несълала
къ немоу слезъ
на море рано - 181. ꙗрославьна рано плачеть
въ поутивли на забралѣ а рькоучи - 182. свѣтьлое и тресвѣтьлое сълньце
вьсѣмъ тепло и красьно еси - 183. чемоу господине простьре
горѧчюю свою лоучю на лады вои
въ полѣ безводьнѣ
жажею имъ лоучи съпрѧже
тоугою имъ тоулы затъче - 184. Прысноу море полоунощи
идоуть съморци мьглами
игореви кънѧзю
богъ поуть кажеть
из земли половецькыѣ
на землю роуськоую
къ отьню златоу столоу - 185. погасоша вечероу зори
игорь съпить игорь бъдить
игорь мыслию полѧ мѣрить
отъ великаго доноу
до малаго доньца - 186. комонь въ полоуночи
овлоуръ свистноу за рѣкою
велить кънѧзю разоумѣти
кънѧзю игорю небыть - 187. кликноу
стоукноу землѧ въшюмѣ трава
вежи сѧ половецькыѣ подвизашасѧ - 188. А игорь кънѧзь поскочи
горьностаемь къ тростию
и бѣлымь гоголемь на водоу - 189. въвьржесѧ на бързъ комонь
и скочи съ него босымь вълкомь - 190. и потече къ лоугоу доньца
и полетѣ соколомь подъ мьглами
избиваꙗ гоуси и лебеди
завътрокоу и обѣдоу и оужинѣ - 191. коли игорь соколомь полетѣ
тогда вълоуръ вълкомь потече
троусѧ собою стоуденоую росоу
претъргоста бо своꙗ бързаꙗ комонѧ - 192. Донець рече
- 193. кънѧже игорю
не мало ти величиꙗ
а коньчакоу нелюбиꙗ
а роуськои земли веселиꙗ - 194. игорь рече о доньче
- 195. не мало ти величиꙗ
лелѣꙗвъшю кънѧзѧ на вълнахъ
стьлавъшю емоу зелѣноу травоу
на своихъ сьребреныхъ березѣхъ
одѣвавъшю его теплыми мъглами
подъ сѣнию зеленоу древоу - 196. стрежаше его гоголемь на водѣ
чаицами на строуꙗхъ
чьрнѧдьми на ветрѣхъ - 197. не тако ли рече рѣка стоугна
хоудоу строую имѣꙗ
пожьръши чюжи роучьи и строугы
ростьрена къ оустоу
оуношю кънѧзю ростиславоу затвори
дънѣ при темьнѣ березѣ
дънѣпри темьнѣ березѣ - 198. плачетьсѧ мати Ростиславлѧ
по оуноши кънѧзи ростиславѣ - 199. оуныша цвѣти жалобою
и древо сѧ тоугою
къ земли прѣклонило - 200. А не сорокы вътроскоташа
на слѣдоу игоревѣ
ѣздить гзакъ съ коньчакомь - 201. тогда врани не граꙗхоуть
галици помълкоша
сорокы не троскоташа - 202. полозие пълзоша
только дѧтьлове текътомь
поуть къ рѣцѣ кажють
соловии веселыми пѣсньми
свѣтъ повѣдають - 203. мълвить гъзакъ коньчакови
- 204. аже соколъ къ гнѣздоу летить
соколича рострѣлѧевѣ
своими злачеными стрѣлами - 205. рече коньчакъ ко гъзѣ
- 206. аже соколъ къ гнѣздоу летить
а вѣ сокольца опоутаевѣ
красьною дѣвицею - 207. и рекъ гъзакъ къ коньчакови
- 208. аще его опоутаевѣ красьною дѣвицею
ни нама боудеть сокольца
ни нама красьны дѣвице
то почьноуть наю пътици
бити въ полѣ половецькомь - 209. Рекъста боꙗнъ и ходына
свѧтъславлѧ пѣснотворьца
стараго веремени
ꙗрославлѧ и ольгова
коганѧ хоти - 210. тѧжько ти головѣ кромѣ плечю
зъло ти тѣлоу кромѣ головы
роуськои земли без игорѧ - 211. сълньце свѣтитьсѧ на небесѣ
игорь кънѧзь въ роуськои земли - 212. дѣвици поють на доунаи
вьютьсѧ голоси чрес море до кыева - 213. игорь ѣдеть по боричевоу
къ свѧтѣи богородици пирогощеи - 214. страны ради гради весели
- 215. пѣвъше пѣснь старымъ кънѧземъ
а по томь молодымъ пѣти - 216. славоу игорѧ свѧтъславлича
боуи тоура вьсеволода
владимѣра игоревича - 217. здрави кънѧзи и дроужина
побараꙗ за христьꙗны
на поганыѣ пълкы - 218. кънѧземъ слава
а дроужинѣ
аминь
Ссылка
Если вы используете корпус в научной работе, пожалуйста, сошлитесь на эту публикацию:
Орехов Б. В. Параллельный корпус переводов «Слова о полку Игореве»: итоги и перспективы // Национальный корпус русского языка: 2006—2008. Новые результаты и перспективы. — СПб.: Нестор-История, 2009. — С. 462—473.