Щукинская рукопись
Источник:
Гаврюшин Н. К. Щукинская рукопись «Слова о полку Игореве» // «Слово о полку Игореве» и его время. — М.: Наука, 1985. — С. 405—412.
- 1. Не лѣпо ли ны бяшеть, братіе, начати старыми словесы трудныхъ повѣстіи о пълку Игоревѣ, Игоря Святъславича.
- 2. Начати же ся тои пѣсни по былинамъ сего времени, а не по замышленію Бояню.
- 3. Боянъ бо вѣщіи, аще кому хотяше пѣснь творити, то растекашеся мыслію по древу, сѣрымъ вълком(ъ) по земли, шизымъ орломъ под(ъ) облакы.
- 4. Помняшеть бо, рече, пръвых(ъ) временъ усобицы. Тогда пущашеть і̃ соколовъ на стадо лебедеи, которыи дотечаше, та преди пѣснь пояше старому Ярославу, храброму Мстиславу, иже зарѣза Редедю предъ пълкы касожьскыми, красному Романови Святославличу.
- 5. Боянъ же, братіе, не і̃ соколовъ на стадо лебедеи пущаше, нъ своя вѣщія пръсты на живая струны въскладаше, они же сами княземъ славу рокотаху.
- 6. Почнем(ъ) же, братіе, повѣсть сію от(ъ) стараго Владимера до ны[нѣ ]шняго Игоря, иже истягну умъ крѣпостію своею и поостри сердца своего мужествомъ,
- 7. наплънився ратнаго духа, паведе своя храбрыя плъкы на землю половѣцькую за землю руськую.
- 8. Тогда Игорь възрѣ на свѣтлое солнце и видѣ от(ъ) него тьмою вся своя […] прикрыти.
- 9. И рече Игорь къ дружинѣ своеи:
- 10. братіе и дружино, лу[цежъ] бы потяту быти, неж(е) полонену быти,
- 11. а всядем(ъ), братіе, на свои бръзыя комони, да позримъ синего Дону.
- 12. – – –
- 13. Хощу бо, рече, копіе приломити конецъ поля половецкаго съ вами, русици, хошу главу свою приложити, а любо испити шеломомь Дону.
- 14. Бояне, соловію старого времени! Абы ты сіа плъкы ущекоталъ, скача славію по мыслену древу, летая орломъ подъ облакы, свивая славію оба полы сего времени, рища въ тропу Трояню чресъ поля на горы.
- 15. Пѣти было пѣснь Игореви, того […] внуку.
- 16. Не буря соколы занесе чрезъ поля широкая, галицы стады бѣжать къ Дону великому.
- 17. Чили въспѣти было, вѣщеи Бояне, Велесовъ внуче.
- 18. Комони ржуть за Сулою, звѣнить слава въ Кыевѣ, трубы трубять въ Новѣградѣ, стоять стязи въ Путивлѣ, Игорь ждетъ мила брата Всеволода.
- 19. И рече ему буи туръ Всеволодъ:
- 20. одинъ брат(ъ), одинъ свѣтъ свѣтлыи ты, Игорю, оба есвѣ Святъславличя.
- 21. Сѣдлаи, брате, свои бръзыя комони,
- 22. а мои ти готови, оседлани у Курьска напереди.
- 23. А мои ти куряни свѣдоми къмети, подъ трубами повити, подъ шеломы възлѣлѣяни, конець копія въскръмлени,
- 24. пути имъ вѣдоми, яругы имъ знаеми, луци у нихъ напряжени, тули отворени, сабли изъострени,
- 25. сами скачють аки сѣрыи влъци въ полѣ, ищучи себѣ чти, а князю славы.
- 26. Тогда въступи Игорь князь въ златъ стремень и поѣха по чистому полю.
- 27. Солнце ему тьмою путь заступаше,
- 28. нощь стонущи ему грозою итичь убуди. […]
- 29. Дивъ кличеть връху древа, велитъ послушати земли незнаемѣ, Влъзе, и Поморію, и Посулію, и Сурожу, и Корсуню, и тебѣ, Тьмутораканьскыи блъванъ.
- 30. А половци неготовами дорогами побѣгоша къ Дону великому, крычатъ телѣгы полунощы, рци, лѣбеди роспущени. Игорь къ Дону вои ведетъ […],
- 31. влъци грозу въсрожать по яругамъ, орли клектомъ на кости звѣри зовутъ, лисици брѣшутъ на чрълѣныя щиты.
- 32. Руская земле, уже за Шеломянемъ еси.
- 33. Длъго ночь мркнетъ,
- 34. заря свѣтъ запала, мьгла поля покрыла,
- 35. щекотъ славіи успе, говоръ галичь убуди.
- 36. Русичи великая поля чрьлеными щиты прегородиша, ищущи себѣ чти, а князю славы.
- 37. Съ заранія въ пяткъ потопташа поганыя плъкы половецкыя, и рассушяся стрѣлами по полю, помчаша красныя дѣвкы половецкыя, а с ними злато, и паволокы, и драгыя оксамиты […];
- 38. япончицами и кожухы начашя мосты мостити по болотомъ и грязивымъ мѣстом(ъ) и всякыми узорочьи половѣцкыми.
- 39. Чрьленъ стягъ, бѣла хорюговь, чрьлена чолка, сребрено стружіе храброму Свят(ъ)славличу.
- 40. Дремлетъ въ полѣ Олгово хороброе гнѣздо. Далече залетело.
- 41. Не было оно обидѣ порождено, ни соколу, ни кречету, ни тебѣ, чръныи воронъ, поганыи половчине.
- 42. Гзакъ бѣжить сѣрымъ влъком(ъ), Кончакъ ему слѣдъ править къ Дону великому.
- 43. Другаго дни велми рано кровавыя зори свѣтъ повѣдаютъ.
- 44. Чръныя тучи съ моря идуть, хотять прикрыти д̃ солнца, а в нихъ трепещуть синіи млъніи.
- 45. Быти грому великому, итти дождю стрѣлами съ Дону великого.
- 46. Ту ся копіемъ приламати, ту ся саблямъ потручати о шеломы половецкыя на рѣцѣ на Каялѣ у Дону великого.
- 47. Руская землѣ, уже за Шеломянемъ еси.
- 48. Се вѣтри, Стрибожи внуци, вѣютъ съ моря стрѣлами на храбрыя плъкы Игоревы.
- 49. Земля тутнетъ, рѣкы мутно текуть, пороси поля прикрывають,
- 50. стязи глаголютъ: половци идуть от(ъ) Дона, и от(ъ) моря,
- 51. и от(ъ) всѣхъ стран(ъ). Рускыя плъкы отступиша.
- 52. Дѣти бѣсови кликомъ поля прегородиша, а храбріи русици преградиша чрълеными щиты.
- 53. Яръ туре Всеволодѣ, стоиши на борони, прыщеши на вои стрѣлами, грѣмлеши о шеломы мечи харалужными.
- 54. Камо, туръ, поскочаше, своимъ [з]латым(ъ) шеломомъ посвѣчивая, тамо лежать поганыя головы половецкыя.
- 55. Поскепаны саблями калеными шеломы оварьскыя от(ъ) тебе, яръ туре Всеволоде.
- 56. – – –
- 57. Были вѣчи Трояни, минула лѣта Ярославля, были плъци Олговы, Олга Святъславлича.
- 58. Тъи бо Олегъ мечемъ крамолу коваше и стрѣлы по земли сѣяше.
- 59. Ступаетъ въ златъ стремень въ градѣ Тьмутороканѣ.
- 60. Тоже звонъ слыша давныи великыи Ярославль
- 61. сынъ Всеволод(ъ), а Владимиръ по вся утра уши закладаше в Черниговѣ.
- 62. Бориса же Вячеславлича слава на судъ приведе […] за обиду Олгову, храбра и млада князя.
- 63. – – –
- 64. Тогда при Олзѣ Гориславличи сѣяшеться и растяшеть усобицами, погибашеть жизнь Даждь Божа внука, въ княжихъ крамолахъ вѣци человѣкомъ скратишась.
- 65. Тогда по рускои земли рѣтко ратаевѣ кикахуть, нъ часто врани граяхуть, […] хотять полѣтѣти на уѣдіе.
- 66. То было въ ты рати и въ ты плъкы, а сице и рати не слышано. Съ зараніа до вечера, съ вечера до свѣта летять стрѣлы каленыя, гримлють сабли о шеломы, трещать копіа харалужныя въ полѣ н[е] знаемѣ срѣди земли половецкыи.
- 67. Чръна земля подъ копыты, костьми была посѣяна, а кровію польяна, тугою взыдоша по рускои земли.
- 68. Что ми шумить, что ми звенить далече рано пред(ъ) зорями?
- 69. Игорь плъкы заворочаеть. жаль бо ему мила брата Всеволода.
- 70. Бишася день, бишася другыи. Третьяго дни къ полуднію падоша стязи Игоревы.
- 71. Ту ся брата разлучиста на брезѣ быстрои Каялы.
- 72. Ту кроваваго вина не доста.
- 73. Ту пиръ докончаша храбріи русичи: сваты попоиша, а сами полѣгоша за землю рускую.
- 74. Ничить трава жалощами, а дрѣво съ тугою къ земли преклонилось.
- 75. Уже бо, братіе, не веселая година въстала, уже пустыни силу прикрыла.
- 76. Въстала обида въ силах(ъ) Даждь Божа внука, вступила дѣвою на землю Трояню въсплескала лебедиными крилы на синѣмъ морѣ у Дону плѣщучи. Убуди жирня времена.
- 77. Усобица княземъ: […] рекоста бо братъ брату: се мое, а то мое же. И начаша князи про малое, се великое млъвити, а сами на себе крамолу ковати.
- 78. А поганіи съ всѣхъ странъ прихождаху съ побѣдами на землю рускую.
- 79. О, далече заиде соколъ, птиць бья къ морю.
- 80. А Игорева храброго плъку не крѣсити.
- 81. […]
- 82. Жены рускыя въсплакашася аркучи:
- 83. уже намъ своихъ милыхъ ладъ ни мыслію смыслити, ни думою сдумати, ни очима съглядати, а злата и сребра ни мало того потрепати.
- 84. А въстона бо, братіе, Кіевъ тугою, а Черниговъ напастьми.
- 85. Тоска разліяся по рускои земли. Печаль жирна утече средѣ земли рускыи.
- 86. А князи сами на себе крамолу коваху,
- 87. а поганіи сами побѣдами нарнщуще на рускую землю, емляху дань по бѣлѣ от(ъ) двора.
- 88. – – –
- 89. Святъславъ грозныи великыи кіевьскыи […] наступи на землю половецькую, притопта хлъми и яругы, възмути рѣки и озеры, иссуши потокы и болота, а поганого Кобяка изъ луку моря от(ъ) желѣзныхъ великыхъ плъковъ половецкыхъ, яко вихрь, выторже. И падеся Кобякъ въ градѣ Кіевѣ, въ гридницѣ Святъславли.
- 90. Ту нѣмци и венедици, ту грѣци и морава поютъ славу Святъславлю, каютъ князя Игоря, иже погрузи жиръ во днѣ Каялы, рѣкы половѣцкыя, рускаго злата насыпаша.
- 91. Ту Игорь князь выседе изъ седла злата, а въ сѣдло кощіево.
- 92. Уныша бо градомъ забралы, а веселіе пониче.
- 93. А Святъславъ мутенъ сонъ видѣ. Въ Кіевѣ на горахъ
- 94. си ночь съ вечера одевах(ъ)те мя, рече, чръною паполомою на кроватѣ тисовѣ,
- 95. чръпахуть ми синее вино съ трудомь смѣшено,
- 96. сыпахуть ми тъщими тулы […] великыи женчюгь на лоно
- 97. и нѣгують мя. Уже дъскы безъ кнеса въ моемъ теремѣ златовръсемъ.
- 98. Всю нощь с вечера […] врани възграяху.
- 99. – – –
- 100. И ркоша бояре князю:
- 101. уже, княже, туга умь полонила.
- 102. Се бо два сокола слѣтѣста съ отня стола злата поискати града Тьмутороканя, а любо испити шеломомь Дону. Уже соколома крильца припѣшали поганыхъ саблями, а самаю опуташа въ путины желѣзны.
- 103. Темно бо бѣ въ г̃ д(е)нь: два солнца помѣркоста, оба багряная стлъпа погасоста, и съ нима молодая м(ѣ)с(я)ца, Олегъ и Свят(ъ)славъ тьмого ся поволокоста.
- 104. На рѣцѣ на Каялѣ тьма свѣтъ покрыла: по рускои земли прострошася половци,
- 105. акы пардуже гнѣздо.
- 106. – – –
- 107. – – –
- 108. – – –
- 109. Се бо готьскыя красныя дѣвы въспѣша на брезѣ синему морю, звоня рускымъ златомъ, поють время Бусово, лелѣють месть Шароканю.
- 110. А мы уже, дружина, жадни веселіа.
- 111. Тогда великыи Свят(ъ)славъ изрони злато слово съ слезами смѣшено и рече:
- 112. о моя сыновчя Игорю и Всеволоде, рано еста начала половецкую землю мечи цвѣлити, а себѣ славы искати. Нъ нечестио одолѣсте, нечестно бо кровь поганую проліясте.
- 113. Баю храбрая сердца въ жестоцѣмъ харалузѣ скована, а въ буести закалена.
- 114. Се ли створисте моеи с[р]ебренеи сѣдинѣ.
- 115. – – –
- 116. – – –
- 117. А чи диво ся, братіе, стару помолодити?
- 118. Коли соколъ въ мытехъ бывает(ь), высоко птиць възбиваеть, не дастъ гнѣзда своего въ обиду
- 119. – – –.
- 120. – – –
- 121. – – –
- 122. – – –
- 123. Великыи княже Всеволоде, не мыслію ти прилетѣти издалѣча, отня злата стола поблюсти?
- 124. Ты бо можеши Волгу раскропити, а Донъ шеломы выльяти.
- 125. Аже бы ты былъ, то была бы чага по ногатѣ, а кощеи по рѣзанѣ
- 126. – – –.
- 127. Ты, буи Рюриче, и Давыде, не ваю ли з[л]аченіи шеломы по крови плаваша?
- 128. Не ваю ли храбрая друишна рыкають акы тури, ранены саблями калѣными на полѣ незнаемѣ?
- 129. Вступита, господина, въ злата стремена за обиду сего времени, за землю рускую, за раны Игоревы, буего Святъславлича.
- 130. Галичкыи Осмомыслѣ Ярославе, высоко сѣдиши на своемъ златокованнемъ столѣ, подперъ горы угорьскыи своими желѣзными плъки, заступивъ королеви путь, затворивъ Дунаю ворота, меча бремены чрезъ облакы, суды рядя до Дуная.
- 131. Грозы твоя по землямъ текуть, отворяеши Кіеву врата, стрѣляеши съ отня злата стола салътани за землями.
- 132. Стрѣляи, господинѣ, Кончака, поганого кощея, за землю рускую, за раны Игоревы, буего Святъславлича.
- 133. А ты, буи Романе, и Мстиславе, храбрая мысль носитъ васъ: умъ на дѣло.
- 134. Высоко плаваеши на дѣло въ буести, яко соколъ на вѣтрехъ ширяяся, хотя птицю въ буиствѣ одолѣти.
- 135. Суть бо у ваю желѣзныи напорзи подъ шеломы латиньскыми. Тѣми трѣсну земля, и многы страны […]; литва, ятвязи […] и половци сулици своя повръгоша, а главы своя подклониша подъ тыи мечи харалужныи.
- 136. Нъ уже, княже Игорю, утръпѣ солнцю свѣт(ъ), а дрѣво не бологомъ листвіе срони:
- 137. по Рси и по Сули гради подѣлиша. А Игорева храбраго плъку не крѣсити.
- 138. Донъ ти, княже, кличеть и зоветь князи на побѣду.
- 139. Олговичи храбрыи князи доспѣли на брань.
- 140. Ингварь и Всеволодъ, и вси три Мстиславличи, не худа гнѣзда шестокрилцы, непобѣдными жребіи собѣ власти расхытисте.
- 141. Кое ваши златыи шеломы и сулицы ляцкыи и щиты.
- 142. Загородите полю ворота своими острыми стрѣлами за землю рускую, за раны Игоревы, буего Святъславлича.
- 143. Уже бо Сула не течеть сребреными струями къ граду Переяславлю, и Двина болотомъ течеть онымъ грознымъ полочяномъ нодъ кликомъ поганыхъ.
- 144. Единъ же Изяславъ сынъ Васильковъ позвони своими острыми мечи о шеломы литовьскыя, притрепа славу дѣду своему Всеславу, а самъ подъ чрълеными щиты на кровавѣ травѣ притрепанъ литовскыми мечи […]
- 145. и рекъ:
- 146. дружину твою, княже, птиць крилы пріодѣша, а звѣри кровь полизаша.
- 147. Не быст(ь) ту брата Брячяслава, ни другаго Всеволода. Единъ же изрони жемчюжну душу изъ храбра тѣла чресъ злато ожереліе.
- 148. Унылы голоси, пониче веселіе. Трубы трубять городеньскіи.
- 149. Ярославе и вси внуци Всеславли, уже понизите стязи свои, вонзите свои мечи вережени.
- 150. Уже бо выскочисте изъ дѣднеи славы.
- 151. Вы бо своими крамолами начасте наводити поганыя на землю рускую, на жизнь Всеславлю
- 152. – – –
- 153. – – –
- 154. – – –
- 155. – – –
- 156. – – –
- 157. На Немизѣ снопы стелють головами, молотятъ чепи харалужными, на тоцѣ животъ кладуть, вѣютъ душу от(ъ) тѣла.
- 158. Немизѣ кровави брезѣ не бологомъ бяхуть посѣяни, посѣяни костьми рускихъ сыновъ.
- 159. Всеславъ князь людемъ судяше, княземъ грады рядяше, а самъ въ ночь влъкомъ рыскаше, изъ Кыева дорискаше до куръ Тмутороканя, великому Хръсови влъкомъ путь прерыскаше.
- 160. Тому въ Полотьскѣ позвониша заутренюю рано у святыя Софеи […], а онъ въ Кыевѣ звонъ слышаше.
- 161. Аще и вѣща душа въ друзѣ тѣлѣ, нъ часто бѣды страдаше.
- 162. Тому вѣщеи Боянъ и пръвое припѣвку, смысленыи, реч(е):
- 163. ни хытру, ни горазду, ни птицю горазду суда божіа не минути.
- 164. О, стонати рускои земли, помянувше пръвую годину и пръвыхъ князеи.
- 165. Того стараго Владимира не лзѣ бѣ пригвоздити къ горамъ кіевьскымъ,
- 166. сего бо нынѣ сташа стязи Рюриковы, а друзіи Д(а)в(и)довы […]
- 167. копіа поют(ь) на Дунаи.
- 168. Ярославнын гласъ слышить, зегзицею незнаемъ рано кычеть.
- 169. Полечю, рече, зегзицею по Дунаеви,
- 170. омочю бебрянъ рукавъ въ Каялѣ рѣцѣ,
- 171. утру князю кровавыя его раны на жестоцемъ его тѣлѣ.
- 172. Ярославна рано плачетъ въ Путивлѣ на забралѣ, аркучи:
- 173. о вѣтрѣ вѣтрило, чему, господине, насильно вѣеши?
- 174. Чему мычеши хиновьскыя стрѣлкы на своею нетрудною крилцю н[а] моея лады вои?
- 175. Мало ли ти бяшеть горѣ подъ облакы вѣяти, лелѣючи корабли на синѣ море?
- 176. Чему, господинѣ, мое веселіе по ковылію развѣя?
- 177. Ярославна рано плачеть Путивлю городу на заборолѣ, аркучи:
- 178. о Днепрѣ словутицю, ты пробилъ еси каменныя горы сквозѣ землю половецкую,
- 179. ты лелѣялъ еси на себѣ Святославли носады до плъку Кобякова,
- 180. възлелѣи, господинѣ, мою ладу къ мнѣ, а быхъ не слала къ нему слезъ на морѣ рано.
- 181. Ярославна рано плачеть въ Путивлѣ на забралѣ. аркучи:
- 182. свѣтлое и тресвѣтлое слънце, всѣмъ тепло и красно еси,
- 183. чему, господине, простре горячюю свою лучю на лады вои? Въ полѣ безводнѣ жаждею имъ лучи съпряже, тугою имъ тули затче.
- 184. Прысну море полунощи, идуть сморци мьглами. Игореви князю богъ путь кажет(ь) изъ земли половецкои на землю рускую, къ отню злату столу.
- 185. Погасоша вечеру зари. Игорь спить, Игорь бдить, Игорь мыслію поля мѣрить от(ъ) великого Дону до малаго Донца.
- 186. Комонь в полуночи Овлуръ свисну за рѣкою: велить князю разумѣти […].
- 187. Стукну земля, въсщумѣ трава. Вежи ся половецкія подвизошася,
- 188. а Игорь князь поскачи горностаемъ къ тростію и бѣлымъ гоголем(ъ) на воду.
- 189. Въвръжеся на бръзъ комонь и скочи съ него босымъ влъкомъ.
- 190. И потече въ лугу Донца, и полетѣ соколом(ъ) подъ мьглами, избивая гуси и лебеди завтроку, и обѣду, и ужинѣ.
- 191. Коли Игорь соколомъ полѣтѣ, тогда Влуръ влъкомъ потече, труся собою студеную росу: претръгоста бо своя бръзая комоня.
- 192. Донець рече:
- 193. княже Игорю, не мало ти величія, а Кончаку нелюбія, а рускои земли веселіа?
- 194. Игорь рече:
- 195. о Донче, не мало ти величіа, лелѣявшу князя на влънахъ, стлавшу ему зелѣну траву на своихъ сребреныхъ брезѣхъ, одѣвавшу его теплыми мьглами под(ъ) сѣнію зелену древу,
- 196. стрежаше его гоголем(ъ) на водѣ, чаицами на струяхъ, чрьнядьми на ветрѣхъ
- 197. – – –
- 198. – – –
- 199. – – –
- 200. А не сорокы въстроскоташа: на слѣду Игоревѣ ѣздить Гзакъ съ Кончакомъ.
- 201. Тогда врани не граахуть, галици помлъкоша, сорокы не троскоташа,
- 202. полозію ползоша толко. Дятлове тектомъ путь къ рѣцѣ кажуть, соловіи веселыми пѣсньми свѣт повѣдаютъ.
- 203. Млъвить Гзакъ Кончакови:
- 204. аже соколъ къ гнѣзду летить, соколича рострѣляевѣ своими злачеными стрѣлами.
- 205. Рече Кончакъ ко Гзѣ:
- 206. аже соколъ къ гнѣзду летить, а вѣ соколца опутаевѣ красною девицею.
- 207. И рече Гзакъ къ Кончакови:
- 208. аще его опутаевѣ красною дѣвицею, ни нама будетъ сокольца, ни нама красны дѣвице, то почнут(ъ) наю птици бити въ полѣ половѣцкомъ.
- 209. Рекъ Боянъ:
- 210. […] тяжко ти, головѣ, кромѣ плечю, зло ти, тѣлу, кромѣ головы, рускои земли безъ Игоря.
- 211. Солнце свѣтится на небесѣ, Игорь князь въ рускои земли.
- 212. Дѣвици поютъ на Дунаи, вьются голоси чресъ море до Кіева.
- 213. Игорь ѣдетъ по Боричеву къ святѣи Б(огоро)д(и)ци Пирогощеи.
- 214. Страны ради, гради весели,
- 215. пѣвши пѣснь старымъ княземъ, а потомъ молодымъ.
- 216. Пѣти слава Игорго Свят(ъ)славличю, буи туру Всеволоду, Владимиру Игоревичю.
- 217. Здрави князи и дружина, побарая за христьаны на поганыя плъки.
- 218. Княземъ слава, а дружинѣ аминь.
Ссылка
Если вы используете корпус в научной работе, пожалуйста, сошлитесь на эту публикацию:
Орехов Б. В. Параллельный корпус переводов «Слова о полку Игореве»: итоги и перспективы // Национальный корпус русского языка: 2006—2008. Новые результаты и перспективы. — СПб.: Нестор-История, 2009. — С. 462—473.